ᐊᒪᐅᑏᑦ ᐃᒻᒥᓂᖅᓱᖅᑐᑎᒃ ᑮᓇᐅᔭᓕᐅᕋᓱᑐᐃᓐᓇᕋᑎᖕ ᑎᒥᐅᔪᑦ. ᑐᓐᖓᕕᖃᕐᑐᑎᖕ ᐊᔾᔨᒌᖏᑦᑐᓂᑦ ᐅᑉᐱᕆᔭᐅᔪᓂᑦ ᐊᔾᔨᐅᖏᑦᑐᓂᓪᓗ ᑭᓐᖒᒪᕙᔭᐅᕙᑦᑐᓂᑦ ᓄᓇᓕᓐᓄᑦ ᓄᓇᕗᒥ ᐊᒻᒪ ᑕᑎᒋᔭᐅᓪᓗᑎᖕ ᐃᓚᐃᓐᓈᑦᑕᐃᓕᓂᒃᑯᑦ ᐊᕐᖕᓇᓂᑦ ᓄᓇᕗᒥᐅᓂᑦ. ᐊᒪᐅᑏᑦ ᑐᕌᒐᖃᕐᑐᑦ ᐃᒫᖕ:

• ᑭᒡᒐᕐᑐᐃᔨᐅᓪᓗᑎᖕ ᐊᕐᖕᓇᐃᑦ ᐱᔪᒪᔭᖏᓐᓂᑦ
• ᐃᑲᔪᕐᑐᕐᓗᒋᑦ ᐊᔪᓐᖏᓂᓕᒫᖏᓐᓄᑦ ᐱᔪᓐᓇᕐᓯᖁᓪᓗᒋᑦ
• ᑕᓯᐅᕐᑎᒋᔭᐅᓪᓗᑎᖕ ᐊᕝᕕᐊᕈᑕᐅᕙᑦᑐᑦ ᐊᐳᕈᑕᐅᕙᑦᑐᓂᓪᓗ ᐊᑦᓱᕈᕐᓇᕐᑐᓂᑦ ᐊᓂᒍᐃᔪᓐᓇᕐᓯᖁᓪᓗᒋᑦ ᐊᑦᓱᕉᑎᒋᓯᔭᖏᓐᓂᑦ ᖁᐊᖅᓵᖅᓯᒪᒧᑦ ᑎᑭᑉᐸᓪᓕᐊᔪᓄᑦ ᓄᓇᐃᖅᑕᐅᓂᑯᒧᑦ, ᑕᐅᑦᑐᖃᑎᒋᓐᖏᑕᒥᓄᑦ ᐃᓖᔮᖑᒧᑦ, ᖃᐃᕋᔪᐊᑦᑐᑦ ᒪᓃᓗᑭᓵᓪᓗ (LGBTQ2) ᐊᔾᔨᐅᖏᑎᑕᐅᓂᖏᓐᓄᑦ ᐊᒻᒪ ᐊᓯᖏᓐᓂᑦ ᐃᓚᐃᓐᓈᕈᑕᐅᕙᑦᑐᓂᑦ ᐃᓕᔮᖃᕐᐸᑦᑐᓂᓪᓗ ᓈᒻᒪᑦᓴᖏᓗᐊᕐᓂᑯᒧᑦ.

ᐊᒪᐅᑏᑦ ᖃᐅᔨᓇᓱᐊᖅᑳᐸᒻᒪᑕ ᐃᓚᒋᔭᐅᔪᓂᑦ ᓇᐅᒃᑯᑐᐃᓐᓇᖅ, ᐱᖃᓯᐅᔾᔨᓪᓗᑎᖕ ᓄᓇᖅᑲᑎᖏᓐᓂᑦ ᑲᑎᒪᑎᑦᓯᕙᑦᑐᑎᖕ. ᐃᓚᒋᔭᐅᔪᑦ ᐊᕐᓇᓕᒫᑦ ᓄᓇᕗᒥᐅᑕᑦ ᑭᓯᐊᓂ ᐃᓚᒋᔭᐅᔪᒪᔪᓐᓃᓂᖅᑲᑕ.

ᐱᒋᐊᕐᑎᑦᓯᓚᐅᕐᑐᑦ ᑲᑎᒪᔩᑦ ᐊᒪᐅᑎᒃᑯᓐᓂᑦ ᑲᑎᓚᐅᕐᓯᒪᔪᑦ ᑎᓯᒻᒪ 2019ᖑᑎᓪᓗᒍ ᖃᓄᖅᑑᖅᑐᑎᖕ ᐊᖅᑯᑎᒋᓂᐊᕐᑕᒥᓂᖕ ᖃᓄᒃᑲᓐᓂᖅ ᐊᕐᖕᓇᐃᑦ ᐃᓚᖏᓪᓗ ᓄᓇᕗᒥᐅᑦ ᐊᑲᕐᕆᔮᒃᑲᓂᕈᓐᓇᕐᒪᖔᑕ. ᐊᒪᐅᑏᑦ ᐅᐸᓗᖓᐃᕐᓯᒪᔭᖏᑦ ᐸᕐᓇᐅᑏᑦ ᐊᕐᕌᒍᖏᓐᓄᑦ 2020–2024 ᑐᓐᖓᕕᐅᓂᐊᕐᑐᑦ ᖃᓄᐃᓕᐅᕐᓂᐊᕐᒪᖔᕐᒥ ᑲᑐᔾᔨᖃᑎᒌᖏᑦ ᐊᕐᕌᒍᑦ ᑕᓪᓕᒪᑦ ᐃᓗᐊᓂ ᐊᒡᒋᕐᑐᓂ.

ᓱᓇᒥᖕ ᑲᔪᓯᑎᑦᓯᔪᒪᕕᑕ

ᐊᒪᐅᑏᑦ ᑐᑭᓯᓯᒪᒻᒪᑕ ᐊᔾᔨᒌᖏᑦᑐᕈᓘᔭᓂᑦ ᐊᑲᐃᓪᓕᐅᕈᑎᖃᕐᐸᒻᒪᑕ ᐃᓱᒫᓗᓇᕐᑐᓂᑦ ᐊᕐᖕᓇᓄᑦ ᓄᓇᕗᒥᐅᓄᑦ − ᐆᑦᑑᑎᒋᓗᒍ ᐃᓚᒌᑦ ᓂᖓᖃᑦᑕᐅᑎᕙᑦᑐᑦ, ᐊᔪᖅᓴᕐᓂᖅ ᓱᒃᑯᒧᑦ ᐊᒻᒪ ᐃᓚᐃᓐᓈᕐᑕᐅᒧᑦ ᐋᓐᓂᐊᖅᑐᓕᕆᓂᖕᒥ ᐃᓕᓐᓂᐊᕐᓂᓕᕆᓂᖕᒥᓗ − ᐱᖃᑕᐅᑎᑦᓯᓯᐊᕐᓂᖅ ᐊᕐᖕᓇᓂᑦ ᓄᓇᕗᑦ ᓯᓚᑖᓃᑦᑐᓂᑦ. ᐊᒪᐅᑏᑦ ᐃᑲᔪᕐᓂᐊᕐᒥᔪᑦ ᐊᕐᖕᓇᓂᑦ ᓄᓇᕗᑦ ᓯᓚᑖᓃᑦᑐᓂᑦ ᖃᓪᓗᓈᓂᕐᒥᐅᓂᑦ. ᐊᒪᐅᑏᑦ ᐊᖏᖅᓯᒪᒋᕗᑦ ᐱᓇᓱᐊᕐᑕᖓᑦ ᑭᓱᓕᕆᔨᐅᓂᐊᕐᓂᖏᓪᓗ ᑲᑐᔾᔨᖃᑎᒌᖏᑦ ᐃᓱᒫᓗᒋᔭᐅᕙᑦᑐᑦ ᖃᓄᖅᑑᕈᑕᐅᖁᓪᓗᒋᑦ ᖃᓄᐃᓐᖏᑦᓯᐊᖁᓪᓗᒋᑦ ᐃᓄᓕᒫᑦᓯᐊᑦ, ᐊᕐᓇᐅᒐᓗᐊᕐᐸᑦ ᐊᖑᑕᐅᒐᓗᐊᕐᐸᓪᓗ, ᐅᑭᐅᖃᑎᒌᓐᖏᑲᓗᐊᕐᐸᑕ ᐊᒻᒪ ᑭᓇᑐᐃᓐᓇᐅᒐᓗᐊᕐᐸᑦ ᐱᒡᒐᕋᓗᐊᕐᐸᑦ ᐱᒡᒐᖏᒃᑲᓗᐊᕐᐸᓪᓗ.

ᐅᑉᐱᕆᔭᑦᑕ ᑐᓐᖓᕕᖏᑦ

ᐊᔾᔨᒌᑎᑦᓯᓯᐊᕐᓂᖅ, ᓯᓚᑐᓂᖅ, ᓇᓪᓕᓂᖅ, ᐃᖅᑲᓱᓐᓂᖅ ᐃᑉᐱᒍᓱᑦᑎᐊᕐᓂᒃᑯᑦ, ᑲᑉᐱᐊᑦᑕᐃᓐᓂᖅ, ᐅᑉᐱᕐᓇᓐᓂᖅ, ᒥᑭᓪᓕᑎᕈᓐᓇᕐᓂᖅ ᐊᒻᒪ ᓱᓕᔪᒥᒃ ᑭᓯᐊᓂ ᓂᓪᓕᐅᑎᖃᖅᐸᓐᓂᖅ ᑐᓐᖓᕕᓪᓚᕆᐅᒻᒪᑕ ᐃᓄᐃᑦ ᐅᑉᐱᕆᔭᖏᓐᓄᑦ, ᓯᕗᓕᑦᑎᓐᓂᑦ ᑭᖑᕚᑦᑎᓐᓄᑦ ᐃᓄᓐᖑᖅᓴᐃᒍᑎᑐᖄᓗᐃᑦ, ᑐᓐᖓᕕᒋᔭᐅᓪᓚᕆᑦᑐᑦ ᐊᒪᐅᑏᑦ ᐱᔭᑦᓴᖏᓐᓄᑦ. ᑕᒪᒃᑯᐊ ᐅᑉᐱᕆᔭᐅᔪᑦ ᑐᓐᖓᕕᖏᑦ ᐱᓕᒻᒪᑦᓴᐅᑎᑐᖃᐅᒻᒪᑕ ᐊᕐᖕᓇᐃᑦ ᐃᓄᑦᓯᐊᕙᐅᖁᓪᓗᒋᑦ ᐊᒻᒪ ᐃᓚᒋᔭᐅᑦᓯᐊᕈᓐᓇᕐᓯᖁᓪᓗᒋᑦ ᐃᓅᖅᑲᑎᒌᓄᑦ ᓄᓇᖅᑲᑎᖏᓐᓄᓗ.

ᐱᔨᑦᓯᕐᑎᐅᕗᒍᑦ ᐅᑉᐱᕆᔭᐅᓂᒃᑯᑦ ᕿᒪᐃᑐᐃᓐᓇᔾᔮᖏᓂᒃᑯᑦ ᓂᐱᒋᔭᐅᓪᓗᑕ ᐃᓚᒋᔭᐅᔪᓄᑦ, ᐊᒪᐅᑏᑦ ᐃᒪᐃᓕᐅᕐᓂᐊᕐᑐᑦ:

• ᑕᐃᒪᓐᖓᓕᒫᖅ ᑐᓴᕋᓱᐊᖏᓐᓇᕐᓗᑕ ᐃᓚᒋᔭᐅᔪᓂᑦ ᐊᒻᒪ ᑕᐃᒫᑦᓴᐃᓐᓇᖅ ᐱᓇᓱᐊᕐᑐᓂᑦ ᑲᑐᔾᔨᖃᑎᒌᓂᑦ
• ᑐᑭᓕᓐᓂᑦ ᓴᖅᑭᖅᓯᒪᔪᓂᑦ ᐊᑐᖅᐸᓪᓗᑕ ᓯᕗᓪᓕᐅᑎᒋᐊᓖᑦ ᓇᓗᓇᐃᕐᑕᐅᕙᓪᓕᐊᖁᓪᓗᒋᑦ ᐊᒻᒪ ᐆᑦᑑᑎᑦᓴᓂᑦ ᖃᓄᑎᒋ ᑲᔪᓯᑦᓯᐊᕐᑎᒋᓯᒪᒻᒪᖔᑕ
• ᐃᑲᔪᖅᑎᐅᖃᑎᒌᓐᓂᒃᑯᑦ ᐊᓯᖏᓐᓂᑦ ᐱᓇᓱᐊᖃᑎᖃᖅᐸᓪᓗᑕ ᐃᓱᒫᓘᑎᖃᕐᐸᑦᑐᓂᑦ ᐊᕐᖕᓇᐃᑦ ᐱᔪᒪᔭᖏᓐᓂᑦ ᐊᔪᕈᕐᓃᖅᓴᕈᑎᑦᓴᓂᑦ ᐊᑐᐃᓐᓇᖃᕐᓂᒃᑯᑦ ᐃᖅᑲᓇᐃᔭᕐᑎᑦᓴᓂᑦ, ᑮᓇᐅᔭᕐᑖᕕᑦᓴᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐊᑲᐃᓪᓕᐅᕈᑏᑦ ᐋᖅᑭᑉᐸᓪᓕᐊᒍᑎᑦᓴᖏᓐᓂᑦ ᐊᒻᒪ ᐋᖅᑮᒍᑕᐅᔪᓐᓇᕐᑐᓂᑦ ᕿᓂᖅᐸᓪᓗᑕ
• ᒪᑐᐃᓐᖔᑦᓯᐊᕐᓗᑕ ᓴᖅᑭᔮᑦᓯᐊᕐᓗᑕᓗ ᑐᓴᐅᒪᖃᑦᑕᐅᑎᕙᓪᓗᑕ ᐊᒻᒪ ᐃᖅᑲᓱᑦᑎᐊᕐᓂᒃᑯᑦ ᐅᖃᖃᑎᖃᕐᐸᓪᓗᑕ ᒐᕙᒪᒃᑯᑦ ᐊᖏᔪᖅᑲᐅᑎᖏᓐᓂᑦ, ᒐᕙᒪᑦ ᐊᐃᕙᔨᖏᓐᓂᑦ ᐊᒻᒪ ᐱᔨᑦᓯᕐᑎᐅᕙᑦᑐᓂᑦ.

ᐅᐸᓗᖓᐃᕐᑕᐅᓯᒪᔪᑦ ᓯᕗᓪᓕᐅᑎᒋᐊᓖᑦ

ᓴᐱᓕᑦᑕᐃᓕᓂᒃᑯᑦ ᐊᓐᓇᐅᒪᑦᓯᐊᕐᓂᒃᑯᓪᓗ ᓯᕗᓕᕐᑎᐅᖃᑕᐅᕙᓪᓗᑎᖕ ᐊᕐᖕᓇᐃᑦ ᓄᓇᕗᒥ

• ᑲᑎᒪᔭᕆᐊᖃᓕᕋᐃᑉᐸᑕ ᓄᓇᓕᓐᓂᑦ ᑲᑎᒪᑎᑦᓯᕙᓪᓗᑕ
• ᐱᒋᐊᕐᑎᑦᓯᓗᑕ ᐃᓱᒪᑕᕆᔭᐅᔪᓐᓇᕐᑐᓂᑦ ᐱᓕᒻᒪᑦᓴᐃᔪᓐᓇᕐᑐᓂᑦ ᐊᔪᕈᕐᓃᖅᓴᕈᑎᑦᓴᓂᓪᓗ ᖃᓄᐃᓕᐅᕐᑎᑦᓯᕙᓪᓗᑕ
• ᐱᒃᑯᒋᔭᐅᕙᓪᓗᑎᖕ ᖁᕕᐊᓲᑕᐅᕙᓪᓗᑎᓪᓗ ᓄᓇᕗᒥᐅᑦ ᐊᕐᖕᓇᐃᑦ ᐱᔭᕇᕐᐸᓪᓕᐊᔭᖏᑦ ᐃᑲᔫᑎᑦᓴᑦ

ᐊᔪᖅᓴᕈᓐᓃᐸᓪᓕᐊᖁᓪᓗᒋᑦ ᓱᒃᑯᑦ ᐃᓅᓯᖏᓐᓂᓗ ᐊᑲᕐᕆᓂᖅᓴᐅᓕᖁᓪᓗᒋᑦ

• ᖃᓄᖅᑑᐸᓪᓗᑕ ᑕᐃᒪᓐᖓᓕᒫᖅ ᐸᐃᕆᕕᑦᓴᖃᑦᓯᐊᖁᓪᓗᑕ ᐃᓚᒌᓄᓪᓗ ᐃᑲᔪᕐᕕᑦᓴᓂᑦ ᓄᓇᕗᒥ ᐊᑐᐃᓐᓇᕐᑕᖃᖁᓪᓗᒍ
• ᓇᐅᑦᓯᕐᑐᖅᐸᓪᓗᑕ ᐅᓂᒃᑳᕆᕙᓪᓗᒋᓪᓗ ᖃᓄᑎᒋ ᓱᕐᕋᐃᕙᓪᓕᐊᑎᒋᒻᒪᖔᑕ ᓄᓇᓖᑦ ᐃᖅᑲᖅᑐᐃᕕᖏᑦ, ᐃᓱᒪᓕᕆᔨᖏᑦ ᐊᒻᒪ ᐊᔪᓕᕐᓯᒪᔪᑦ ᑭᓱᑐᐃᓐᓇᕐᒧᑦ ᐊᑲᐅᓯᓴᖅᕖᑦ, ᐊᒻᒪ ᐃᓕᓐᓂᐊᕐᓂᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᐱᔨᑦᓯᕐᓂᕆᕙᑦᑕᖏᑦ

ᕿᒥᕐᕈᓗᑕ ᐅᓂᒃᑳᕆᕙᓪᓗᒋᓪᓗ ᐊᑐᐃᓐᓇᐅᑎᑕᐅᔪᑦ ᐱᐅᒐᓗᐊᕐᒪᖔᑕᓗ ᐱᔨᑦᓯᕈᑕᐅᕙᑦᑐᑦ ᒐᕙᒪᒃᑯᓐᓄᑦ ᑎᓕᔭᐅᔾᔪᑎᐅᓯᒪᔪᑦ ᐃᒪᐃᓕᐅᕐᓂᐊᕐᓂᕋᕐᑐᑎᖕ

• ᐃᑲᔪᕐᑎᐅᖃᑎᖃᕐᓗᑎᖕ ᐊᓯᖏᓐᓂᑦ ᑎᒥᐅᔪᓂᑦ ᐃᒻᒥᒃᑰᕐᓗᑎᓘᓐᓃᑦ, ᐱᓇᓱᐊᕐᑕᐅᓯᒪᔪᑦ ᕿᒥᕐᕈᔭᐅᕙᓪᓗᑎᖕ ᐅᓂᒃᑳᕆᔭᐅᓗᑎᓪᓗ ᖃᓄᑎᒋ ᐃᑉᐱᓐᓂᕈᑕᐅᕙᒻᒪᖔᑕ ᐊᑐᐊᒐᑦ ᐃᑲᔫᑕᐅᓇᓱᐊᕐᑐᓪᓗ ᐅᑭᐅᖅᑕᖅᑑᑉ ᑲᓇᑕᐅᓪᓗ ᒐᕙᒪᒃᑯᖏᓐᓄᑦ ᐊᓯᖏᑕᓗ ᑎᒥᐅᔪᑦ ᐱᔨᑦᓯᕐᑎᐅᕙᑦᑐᑦ ᐊᕐᖕᓇᓂᑦ ᓄᓇᕗᒥ
• ᑕᑎᒋᔭᐅᓂᒃᑯᑦ ᐋᖅᑭᒋᐊᕆᖁᔨᕙᓪᓗᑕ ᐊᑐᐊᒐᕐᓂᑦ ᐃᑲᔫᑕᐅᕙᑦᑐᓂᓪᓗ

ᐊᒪᐅᑏᑦ ᐊᓐᓇᐅᒪᔾᔪᑎᑦᓴᖏᑦ

• ᓈᒻᒪᑦᓴᕐᓗᑕ ᐊᑐᓕᕐᑎᑕᐅᓗᑎᓪᓗ ᐃᑲᔫᑎᑦᓴᑦ ᐊᐅᓚᔾᔭᒋᐊᕐᑕᐅᓂᖏᓐᓄᑦ ᐸᕐᓇᐅᑏᑦ
• ᐋᔩᖃᑎᖃᕐᐸᓪᓗᑕ ᑲᑐᔾᔨᖃᑎᒋᔪᓐᓇᕐᑕᑎᓐᓂᑦ ᐊᖏᖃᑎᒌᒍᑎᒃᑯᑦ

ᐊᑎᖓᑕ ᑐᑭᖓ

ᐊᒪᐅᑏᑦ, ᐊᒥᓲᓂᕋᐃᔪᑦ ᐊᒪᐅᑎᓂᑦ, ᑕᐅᑦᑐᖃᕐᑐᑦ ᐊᒪᐅᑏᑦ ᓇᓴᖅᑯᖅᑐᓪᓗᑎᖕ ᐊᕐᖕᓇᓄᑦ ᐊᑐᖅᑕᐅᒐᔪᑦᑐᑦ. ᐊᒪᐅᑏᑦ ᐊᓐᓄᕌᑐᐃᓐᓇᐅᖏᒻᒪᑕ; ᓴᓇᑦᓯᐊᕐᓯᒪᔪᒻᒪᕆᐊᓗᐃᑦ ᐊᕐᖕᓇᐃᑦ ᐊᒫᖅᑕᖏᑕᓗ ᕿᐅᔾᔭᐃᑯᑎᒋᓪᓗᓂᒋᑦ. ᑐᐃᖏᖕ ᐊᒪᖓᓗ ᐃᓗᑐᓪᓗᑎᖕ ᐅᖅᑯᓴᕐᕕᐅᒻᒪᑦ ᕿᑐᕐᖓᖓᓄᑦ ᐊᓈᓇᖓ ᓂᒪᔭᓐᓂᖓᓂ, ᐊᓪᓛᓘᓐᓃᑦ ᕿᑐᕐᖓᖓ ᑐᓄᖔᖓᓂᖕ ᓵᖓᓅᖅᑎᒍᓐᓇᕐᑐᓂᐅᖕ ᐊᒫᒪᑦᑎᓐᓂᐊᕋᒥᐅᖕ ᐊᓂᓚᐅᕋᓂ ᐸᖅᑭᕕᑦᓯᐊᕙᐅᓪᓗᑎᓪᓗ.

ᐆᑦᑑᑎᖏᑦ ᓴᓇᔭᐅᓂᖓᓗ ᐊᒪᐅᑎᐅᑉ ᐊᔾᔨᒌᖏᑦᓯᐊᕐᒥᔪᑦ ᓄᓇᕗᒥᐅᓂ ᐊᒻᒪ ᖃᓪᓗᓈᕐᑕᑦ ᓄᑖᓐᖑᕐᐸᓪᓕᐊᔪᓂᑦ ᓴᓇᕙᓕᕐᒥᔪᑦ ᒥᖅᓲᑏᓪᓗ ᓄᑖᖑᕐᐸᓪᓕᐊᖏᓐᓇᕐᑐᑦ ᒪᓕᑦᑐᒋᑦ. ᐊᒪᐅᑎᐅᑉ ᐊᑯᖓ (ᐊᑯᓕᒃ) ᐊᒻᒪ ᑕᑯᒥᓇᕐᓴᐅᑎᖏᑦ ᐊᒪᐅᑏᑦ ᐊᔾᔨᐅᖏᔾᔪᑎᒋᕙᐃᑦ ᐊᒡᒍᕐᓯᒪᔪᓂ ᓄᓇᓕᓐᓂ ᓴᓇᔾᔪᓯᖏᑦ ᒪᓕᑦᑐᒋᑦ.

ᓂᕈᐊᕋᑦᑎᒍ ᐊᒪᐅᑏᑦ ᐊᑎᖅᑐᑎᒍ ᓄᓇᕗᒥ ᐃᓄᐃᑦ ᐊᕐᖕᓇᐃᑦ ᑲᑐᔾᔨᖃᑎᒌᖏᑦ, ᐊᖏᑦᓯᒪᕗᒍᑦ ᖁᕕᐊᓲᑎᒋᓪᓗᒍ ᐃᓕᓴᕐᓇᖅᑐᖅ ᐃᓚᒌᓐᓂᒃᑯᑦ ᓇᓪᓕᓐᓂᖅ, ᐃᓕᖅᑯᓯᑦᑎᓂᑦ ᐱᒃᑯᓲᔾᔨᓂᖅ ᐊᒻᒪ ᓴᐱᓕᔪᐃᑦᑑᓂᖏᓐᓂᑦ ᐊᕐᖕᓇᐃᑦ ᓄᓇᕗᒥᐅᑦ.